Tuairisc chun dáta maidir leis an scéim

N/M20 ó Chorcaigh go Luimneach – Tuairisc Chun Dáta don Phobal, Meitheamh 2024

Fíor 0.1: N/M20 ó Chorcaigh go Luimneach – Ár Réiteach Iompair

Fáilte chuig an tuairisc chun dáta leathdhéanach don phobal ar Thionscadal an N/M20 ó Chorcaigh go Luimneach.

I dtús báire, ba mhaith le Foireann an Tionscadail buíochas a ghabháil leis na páirtithe leasmhara go léir ar fud an limistéir staidéir agus lasmuigh de as a gcomhoibriú go dtí seo. Chuir an fhoireann béim mhór ar rannpháirtíocht an phobail agus le linn na n-atriallta éagsúla dearaidh reáchtáladh thart ar 1,000 cruinniú, duine le duine agus ar líne, chun faisnéis a sholáthar agus chun aiseolas a fháil ar ghnéithe éagsúla de dhearadh an tionscadail de réir mar a tháinig sé chun cinn. Chabhraigh sé seo le torthaí dearaidh a bharrfheabhsú agus le maolú a dhéanamh ar thionchair aonair, phobail agus chomhshaoil ​​a eascraíonn ón tionscadal.

Tá an cur chuige maidir le dearadh an tionscadail N/M20 uathúil in Éirinn. Ní hamháin go dtabharfaidh sé aghaidh ar na heasnaimh mhóra shábháilteachta a fhágann gurb é an bóthar N20 ó Chorcaigh go Luimneach an ceann is contúirtí sa tír ach tabharfaidh sé isteach sraith roghanna iompair inbhuanaithe a dhéanfaidh an tionscadal thar a bheith nuálaíoch nuair a chuirfear i dteannta chéile iad. 

Mar thoradh ar sholáthar an mhótarbhealaigh nua M20, aistreofar trácht straitéiseach ón N20 mar atá i láthair na huaire, rud a thabharfaidh faoiseamh do na bailte agus na pobail sin a mbíonn brú tráchta mór á fhulaingt acu faoi láthair. Tiocfaidh feabhas suntasach ar cháilíocht an aeir, laghdú ar thorann agus sábháilteacht feabhsaithe mar thoradh ar an laghdú seo ar thrácht. Tabharfaidh sé seo deis chun spás bóithre a ath-leithdháileadh le haghaidh úsáidí eile ar nós an Taistil Ghníomhaigh nó spásanna poiblí a fheabhsóidh an cháilíocht agus an acmhainneacht maireachtála do gach duine ar an N20 reatha nó atá gar dó.

Cuirfidh Foireann an Tionscadail a líníochtaí dearaidh deiridh i láthair i R4 2024, rud a chuirfidh ar a gcumas tosú ar an bpróiseas foirmiúil reachtúil agus ceadaithe pleanála.

Tá dul chun cinn déanta ar roinnt príomhchinntí/garspriocanna tionscadail ón tuairisc chun dáta deiridh i mí na Samhna 2023:

• Tá cineál bóthair an mhótarbhealaigh roghnaithe, i ndiaidh do mhionbhreithniú a bheith déanta ar na roghanna eile go léir. Is fearr a thabharfaidh mótarbhealach an M20 aghaidh ar na saincheisteanna sábháilteachta suntasacha ar an mbóthar reatha N20 ó Chorcaigh go Luimneach a shábhálfaidh níos mó ná 1,300 imbhualadh le linn tréimhse 30 bliain, laghdóidh sé amanna turais agus spreagfaidh sé úsáid roghanna éifeachtacha iompair phoiblí a bheidh indéanta.
• Tá forbairt dearaidh an tionscadail taistil ghníomhaigh aonair is mó ar tugadh faoi sa Stát go dtí seo ar siúl anois. Nascfaidh suas le 100km de bhonneagar taistil ghníomhaigh shábháilte chomhroinnte pobail ón mBlarna go Tobar Phádraig agus soláthróidh sé rochtain siúil agus rothaíochta do phobail.
• Aithníodh suíomhanna do shé Mhoil Iompair sa Ráth Dhubh, i Mainistir na Móna, i gCill na Mallach, sa Ráth, i mBrú Rí agus i gCromadh. Soláthróidh na moil seo nascacht taistil ghníomhaigh agus iompar poiblí, roghanna “Páirceáil agus Comhroinn” agus pointí luchtaithe d’fheithiclí leictreacha. Tá sé beartaithe freisin go lonnófaí Mol Lastais in aice le hacomhal Mhala an M20/N72/N73.
• Mhol Foireann an Tionscadail go gcuirfí i bhfeidhm córas dola ilphointí gan bhacainn ar an mótarbhealach nua a bhunóidh táillí dola bóthair ar an bhfad a thaistealaítear. Spreagfaidh an moladh seo go mbainfí níos mó úsáide as roghanna taistil inbhuanaithe, amhail taisteal gníomhach, páirceáil agus taisteal (iompar poiblí), agus páirceáil agus comhroinn atá lárnach sa dearadh. Cabhróidh na bearta seo le tacú le Plean Gníomhaíochta an Rialtais ar son na hAeráide maidir le hastuithe iompair a laghdú.

1.1 Cineál Bóthair

De réir mar a théann Foireann an Tionscadail ar aghaidh tríd an gcéim dearaidh reatha seo tá “cineál an bhóthair” don N/M20 socraithe.    

Breithníodh ceithre chineál éagsúla de charrbhealach roinnte (le lárstráice agus na bacainní sábháilteachta bainteacha san áireamh i ngach rogha) mar chuid d’anailís chomparáideach agus deimhníodh gurb é an cineál bóthair “Mótarbhealach” an rogha is fearr maidir le cuspóirí beartais agus tionscadail a bhaint amach.

Tá cruthúnas ann gurb é soláthar mótarbhealaigh, leis na srianta rochtana a bhaineann leis, an cineál bóithre is sábháilte a nascann ár gcathracha, agus go sábhálfaidh sé breis agus 1,300 imbhualadh le linn tréimhse 30 bliain.

Nuair a osclófar é, tiocfaidh feabhas ar ghnáth-amanna taistil idir an Bhlarna, Corcaigh agus Tobar Phádraig, Luimneach ó 60–90 nóiméad faoi láthair go dtí am turais níos iontaofa agus níos tapúla:

• timpeall 40 nóiméad i gcás carranna agus feithiclí earraí éadroma (agus an luasteorainn fógartha cothrom le 120 km/h);
• timpeall 50 nóiméad i gcás feithiclí earraí troma (luasteorainn 90 km/u); agus
• timpeall 45 nóiméad do chóistí (luasteorainn 100 km/u).

1.2 An Dearadh a Fhorbairt

Tá nuashonrú déanta ar an léarscáil Idirghníomhach, atá ar fáil ar shuíomh gréasáin an tionscadail, www.corklimerick.ie. Cuirtear i láthair anois ann Plean Innealtóireachta an Dearaidh Forbartha laistigh de chonair bheachtaithe mhí na Samhna 2023, lena n-áirítear:

• Príomhlíne, Acomhail & Taobh-bhóithre
• Fánaí Táscacha Oibreacha Créafóige
• Suíomh/Méideanna Taistil Ghníomhaigh
• Suíomhanna na Mol
• Suíomh Táscach Locháin Laghdaithe Draenála
  

Fíor 0.2: Suíomh mapála samplach – An Lios Ard lastuaidh den Ráth Dhubh

1.3 Bainistíocht Éilimh

Tá “bainistíocht éilimh” ina phríomhchuid de bheartais iompair na todhchaí mar mhodh chun tionchar a imirt ar iompar taistil agus oibriú i dtreo spriocanna éigeandála aeráide a bhaint amach.   Ionchorpróidh an N/M20 nua bearta bainistíochta éilimh chun úsáid na ngnéithe iompair inbhuanaithe dár dtionscadal a spreagadh, .i. saoráidí taistil ghníomhaigh agus moil iompair a ionchorpraíonn áiseanna luchtaithe d’fheithiclí leictreacha. 

Bunófar córas muirir úsáideoirí, ina n-íocann tiománaithe ar bhonn an achair a thaistealaítear ar an M20, trí úsáid a bhaint as teicneolaíocht “achar saor ó bhacainn bunaithe ar dola”, cosúil leis an gceann atá i bhfeidhm faoi láthair ar an M50 timpeall Bhaile Átha Cliath.  Beidh pointí monatóireachta feadh an bhealaigh i ngach treo, mar a léirítear thíos.   Leis an gcóras ilphointí seo, seachas plás dola amháin nó dhó a bheith ann, laghdófaí an fhéidearthacht a bheadh ann beart a dhéanamh chun an dola a sheachaint, toisc go mbeadh na táillí in aghaidh na coda measartha beag.  Tabhair faoi deara go gcinnfidh Bonneagar Iompair Éireann na luachanna dola mar chuid dá n-ordú dola amach anseo. 

1.4 Taisteal Gníomhach

Soláthróidh an tionscadal an tsaoráid taistil ghníomhaigh aonair is mó sa Stát go dtí seo ina mbeidh thart ar 100 ciliméadar de ‘saoráid taistil ghníomhaigh chomhroinnte trasfhoirmithe (raon rothar nó rotharbhealach a chuirfear ar fáil do dhaoine a bhíonn ag siúl, ag dul ar chathaoir rothaí agus ag rothaíocht)’, déanfaidh sé seo pobail sa Bhlarna, sa Ráth Dubh, i Mala, i dTigh Nua an Dá Phota, i gCill na Mallach, i mBealach Átha, sa Ráth, i mBrú Rí, sa Bhánóg, i gCromadh agus i dTobar Phádraig a nascadh lena chéile. Tá fócas an tionscadail dírithe ar nascacht a fheabhsú le pobail áitiúla atá in aice leis an gconair.

Ón tuairisc chun dáta poiblí deiridh rinneadh na bealaí taistil ghníomhaigh a fheabhsú tuilleadh chun suíomh an bhóthair in aice a thaispeáint. Chomh maith leis sin, baineadh de na moltaí an chuid den bhonneagar taistil ghníomhaigh a moladh ar dtús idir Tigh Nua an Dá Phota agus an M20 ag Cathair Dhúgáin mar gheall gur measadh go bhféadfadh sé tionchar suntasach a bheith aige ar shuíomhanna oidhreachta cultúrtha atá faoi chosaint, agus mar gheall ar thionchair chomhshaoil ​​agus srianta talún.

Éascófar an nasc taistil ghníomhaigh idir an N20 reatha i gceantar Mhala agus an M20 ag an mbealach taistil ghníomhaigh nua atá beartaithe mar chuid de Bhóthar Faoisimh Mhala. Agus an trácht ag aistriú go bealach nua an M20 beidh níos lú tráchta sna pobail feadh an N20 mar atá agus beidh sé níos sábháilte agus níos taitneamhaí a bheith ag siúl agus ag rothaíocht iontu. Soláthróidh an laghdú ar an méid tráchta agus ar an luas ar an N20 mar atá faoi láthair deiseanna freisin chun an réimse poiblí a fheabhsú laistigh de na pobail seo.

Cuirfear saoráidí taistil ghníomhaigh chomhroinnte nua ar fáil idir pobail. Go ginearálta is é 3 mhéadar leithead an chosáin a bhfuil dromchla air ach féadfaidh sé go mbeidh gá le hé a bheith níos lú ag caolais ag pointí ar leith. Go hiondúil titfidh an áis faoi scáth ceann amháin de thrí choincheap mar a thuairiscítear thíos agus a léirítear sna grafaicí:

• Coincheap A– Suite ar imeall chonair iompair nua an M20 ach go hiondúil i bhfad ó thrácht beo ar phríomhlíne an M20 agus scartha le hoibreacha créafóige, fálta agus tírdhreachú. 

Fíor 0.3: Coincheap Taistil Ghníomhaigh A

• Coincheap B – An spás bóthair atá ann cheana féin ar chodanna níos leithne de charrbhealach an N20 a ath-leithroinnt nuair a bheidh sé dí-rangaithe, sna háiteanna sin a laghdófar an leibhéil tráchta go suntasach, laghdófar teorainneacha luais agus ní bheidh guaillí crua ag teastáil a thuilleadh.

Fíor 0.4: Coincheap Taistil Ghníomhaigh B

• Coincheap C – Áiseanna taistil ghníomhaigh feadh na mbóithre atá ann cheana féin (bóithre réigiúnacha agus áitiúla go ginearálta).  Go hiondúil bíonn na bóithre seo níos cúinge ná an N20 reatha le codanna d’fhásra dlúth agus teorainneacha cónaithe gar d’imeall an bhóthair. 

Fíor 0.5: Coincheap Taistil Ghníomhaigh C

Léiríonn na trí choincheap seo an tsaoráid taistil ghníomhaigh thipiciúil a bheidh in aice leis an mbóthar i bhformhór na gcásanna. Beidh cásanna ann freisin ina mbeidh bealaí taistil ghníomhaigh ann nach bhfuil taobh le bóthar.

Is dócha go mbeidh thart ar:

• 62km de Choincheap A 
• 30km de Choincheap B
• 5km de Choincheap C

Cuirtear achoimre ardleibhéil ar na moltaí maidir le saoráidí taistil ghníomhaigh comhúsáide i láthair sa Líníocht Forbhreathnú ar an Moladh um Thaisteal Gníomhach a Fhorbairt. Don tuairisc chun dáta seo, tá tuilleadh forbartha déanta ar an dearadh Taistil Ghníomhaigh agus tá níos mó sonraí suímh curtha ar fáil anois i líníochtaían Mholta um Thaisteal Gníomhach a Fhorbairt.

Beidh siúlóirí, rothaithe agus úsáideoirí soghluaisteachta eile ar na háiseanna nua seo ina meascán de chomaitéirí/daoine atá ag taisteal ar mhaithe le háisiúlacht, turasóirí agus úsáideoirí fóillíochta a fhéadfaidh rogha a dhéanamh úsáid a bhaint as an áis taistil ghníomhaigh chomhúsáide mar chuid de bhealach ciorclach. 

Ar leithligh de sin, tá Bonneagar Iompair Éireann agus na húdaráis áitiúla ábhartha ag cur pleanáil agus dearadh roinnt Tionscadal Glasbhealaí chun cinn sa réigiún. Leanfaidh an tionscadal N/M20 ó Chorcaigh go Luimneach ar aghaidh ag comhordú leis na Tionscadail Glasbhealaí seo maidir le forbairt na n-áiseanna taistil ghníomhaigh ar an N/M20 chun líonra comhtháite a chinntiú. 

1.5 Moil Iompair 

Mar chuid de thuairisc chun dáta mhí na Samhna 2023, thug foireann Thionscadal an N/M20 isteach an coincheap na “Moil Iompair” bunaithe ar chomhtháthú iompair, an comhshaol agus sábháilteacht, agus cur chuige iomlánaíoch, inbhuanaithe atá dírithe ar an úsáideoir lena chinntiú gur cuid chomhtháite dár réiteach iompair iad. Is iad na ceithre threoirphrionsabal atá taobh thiar de seo ná: 

Fíor 0.6: Coincheap na Mol Iompair

Ó shin i leith, tá forbairt tagtha ar an ngréasán molta Mol Iompair faoi threoir ár bprionsabal chun na rudaí seo a leanas a chur san áireamh: ordlathas iompair inbhuanaithe agus measúnú anailíse éilimh a chinntíonn go bhfuil moil suite go cuí agus go bhfuil siad ar an méid cuí chun freastal ar an éileamh reatha ar sheirbhísí agus ar an éileamh a bhfuiltear ag súil leis amach anseo.

Athróidh oibríocht agus méid ár moil de réir suímh ach tá sé ailínithe le “Ár Réiteach Iompair”, an togra iomlánaíoch, ilmhódúil a leagtar amach ag deireadh Chéim 2. Déanann sé seo nascacht le bonneagar taistil ghníomhaigh agus iompair phoiblí a thairiscint, lena n-áirítear Páirceáil & Comhroinn / Páirceáil & Taisteal, agus bonneagar inbhuanaithe amhail luchtú feithiclí leictreacha.

Ar an iomlán, tá sé Mhol Iompair beartaithe. Liostaítear iad thíos, ag tosú leis ag an gceann is faide ó dheas agus ag dul i dtreo an tuaiscirt:

• An Ráth Dhubh
• Mainistir na Móna
• Cill na Mallach
• An Ráth
• Brú Rí
• Cromadh

Fíor 0.7: An Chúis leis na Moil Iompair ar an N/M20

Fíor 0.8: Sampla de Mhol Iompair

Chomh maith leis na sé Mhol Iompair, tá sé beartaithe freisin go lonnófaí Mol Lastais in aice le hacomhal Mhala an M20/N72/N73. Cuirfidh an mol lasta seo saoráidí ar fáil don pháirceáil, do sheirbhísí leasa agus do luchtú feithiclí leictreacha ar feithiclí earraí troma iad, chomh maith le ceanglais Ghréasán Tras-Eorpach Iompair an Aontais Eorpaigh (TEN-T) agus Beartais Phlean na Roinne Iompair don tréimhse 2024–2030 maidir le luchtú feithiclí leictreach en-route mar chuid den Ghréasán Bóithre Náisiúnta a chomhlíonadh.  Cuirfear méid beag páirceála ar fáil d’fheithiclí freisin le haghaidh taisteal gníomhach agus páirceáil agus comhroinn.

Fíor 0.9: Sampla de Mhol Lastais

1.6 Comhshaol

Ón tuairisc chun dáta a tugadh don phobal i mí na Samhna 2023, tá an fhoireann comhshaoil i ndiaidh leanúint ​​ar aghaidh ag tabhairt faoi raon ilghnéitheach gníomhaíochtaí a chuimsíonn suirbhéanna allamuigh agus idirghníomhaíochtaí leis an bhfoireann deartha. Cinntíonn sé seo go bhfuil cúrsaí comhshaoil ​​chun tosaigh i gcónaí sa phróiseas cinnteoireachta. 

Leanann úinéirí talún de rochtain leanúnach ar thailte a sholáthar dúinn dár suirbhéanna siúlóide comhshaoil ​​(cinn éiceolaíochta agus seandálaíochta), ar mhaithe le monatóireacht a dhéanamh ar chaighdeán an aeir, an torainn agus an uisce, le haghaidh imscrúdú suímh (friotaíocht, maighnéadracht, tollphoill taiscéalacha, claiseanna trialacha, sruthchúrsaí agus suirbhéanna topagrafacha) agus do na trinsí tástála seandálaíochta a dhéanaimid. Leanfar leis an obair allamuigh seo le linn Chéim 3 lena chinntiú go bhfuil sonraí láidre ag na foirne comhshaoil ​​chun ár mbearta maolaithe comhshaoil ​​a fhorbairt. 

Leanann Foireann an Tionscadail ag déanamh monatóireachta ar athruithe ar na ceanglais reachtaíochta, ar phróisis measúnaithe comhshaoil ​​agus ar threoir lena n-áirítear, ach gan a bheith teoranta dóibh, ár dtuiscint ar athrú aeráide (go háirithe a riachtanais oiriúnaithe agus maolaithe) agus an gá le bithéagsúlacht a chosaint.

Fíor 0.10: Uirlis Charbóin TII & Lógónna Múnlaí Astaíochta Bóthair

Foilseofar an Tuarascáil ar Mheasúnú Tionchair Timpeallachta, a thabharfaidh sonraí faoi thorthaí na suirbhéanna agus na measúnuithe seo, agus cuirfear faoi bhráid an Bhoird Phleanála í ag deireadh an phróisis deartha agus faofa. 

1.7 Na Chéad Chéimeanna eile

Leanfaidh foireann an tionscadail ag forbairt agus ag feabhsú dhearadh na príomhlíne, na n-acomhal, na mol iompair, an bhonneagair taistil ghníomhaigh, taobh-bhóithre, an chórais draenála, an tírdhreachaithe, bearta maolaithe comhshaoil ​​agus na n-oibreacha coimhdeacha gaolmhara. Leanfaimid orainn ag dul i dteagmháil le gach úinéir talún a mbaineann sé seo leo le linn an phróisis seo chun a chinntiú go gcoinnítear ar an eolas iad agus déanfaimid iarracht an tionchar a d’fhéadfadh a bheith ag an tionscadal orthu a íoslaghdú. 

Leanfaimid orainn ag tabhairt faoi shuirbhéanna innealtóireachta agus comhshaoil, ag déanamh forbairtí ar an dearadh agus de bheith ag déanamh measúnú ar an tionscadal agus ag féachaint le tuairisc chun dáta deiridh don tionscadal a sholáthar ag deireadh na bliana seo roimh aighneacht pleanála a aighneofar in 2025. Mar chuid den phróiseas, fáiltímid roimh gach aiseolas ó úinéirí maoine, pobail, gnólachtaí agus páirtithe leasmhara eile.

Ag deireadh na hoibre mar chuid de Chéim 3 beimid ag cur Cás Gnó an tionscadail faoi bhráid na Roinne Iompair lena fhaomhadh agus nuair a bheidh an Tuarascáil Measúnaithe Tionchair Timpeallachta curtha i gcrích againn, in éineacht leis an Ordú Ceannaigh Éigeantaigh cuirfear na hOrduithe Bóthair faoi bhráid an Bhoird Pleanála chun Céim na Nósanna Imeachta Reachtúla den tionscadal a thosú.

Is mór ag foireann an tionscadail an éascaíocht a rinne úinéirí talún agus an pobal dár gcuid oibre leanúnach a éascú agus tá siad buíoch as a gcomhoibriú leis an tionscadal. Is féidir an nuashonrú tionscadail seo agus sonraí faoi na heilimintí atá á bhforbairt a fháil ar ár suíomh gréasáin tionscadail www.corklimerick.ie. Is féidir teagmháil a dhéanamh le hoifig an tionscadail ar 061 973730 nó info@corklimerick.ie le haghaidh tuilleadh fiosruithe nó chun cruinniú a shocrú le foireann idirchaidrimh an tionscadail.